⸺Haur Eskola⸺
Haur Hezkuntza
(0 -3 urte)
Jolasa ezagutzak garatu eta eskuratzeko bide gisa.
Mugimendua da lehen hizkuntza
Lizarra Ikastolako Haur Eskolan 0 eta 3 urte bitarteko haurrak ikuspegi integral batetik laguntzen ditugu: zaindu, bai, baina baita hezitu ere, haurren erritmoa errespetatuz eta garapen motriz, emozional eta sozial orekatua sustatuz.
Adin hauetan, ikaskuntza gorputzetik sortzen dela sinesten dugu. Horregatik, mugimendu askea eta jolasa dira gure lanaren ardatz nagusiak: jolastuz ikasi eta ikasiz jolastu. Proposamenak esplorazioan, esperimentazioan eta aurkikuntzan oinarritzen dira, aurrerapauso bakoitza —biraka ibiltzea, arrastaka mugitzea, katuka ibiltzea, zutik jartzea, ibiltzea— modu naturalean eta seguruan gertatzeko pentsatutako espazioetan.
Gorputzetik egindako akonpainamendua: BRMT
Gure taldeak BRMT (Blomberg Rhythmic Movement Training) formakuntza du, garapena mugimendu erritmikoen eta gorputz-estrategien bidez behatu eta laguntzeko aukera ematen duen teknika. Horri esker, atsedena, erregulazio emozionala edo erreflexu primarioen integrazioa bezalako alderdiak lantzen dira, koordinazio egokirako eta etorkizuneko ikaskuntzetarako funtsezkoak direnak.
Euskara, hasieratik
Euskara da etapako hizkuntza nagusia. Naturaltasunez bizitzen dugu eguneroko errutinetan, kantetan, jolasean eta harremanetan, hizkuntza loturarekin batera hazten den ingurune afektibo bat sortuz.
Espazio eguneratuak eta hurbileko trataera
Haur Eskolak espazio eguneratuak ditu, egunerokoan txertatutako psikomotrizitate-proposamenekin eta kanpoko gune propioarekin, Los Llanos parkera egiten diren irteerez gain. Estella-Lizarraren erdigunean gaude, eta tratu familiar eta hurbila zaintzen dugu, esperientzia handiko eta egonkorra den hezitzaile-talde batekin.
Orientazioa eta familiekin elkarlana
Hasieratik egiten dugu haurren garapenaren jarraipen estua, eta beharrezkoa denean, orientazio-taldearen laguntza eta familiekin zein beste profesionalekin koordinazioa bideratzen ditugu. Helburua argia da: haur bakoitza seguru, lagundua eta errespetatua sentitzea.
Zerbitzuak
- 4 hilabetetik aurrerako harrera.
- Ordutegi malgua eta goiztiarren zerbitzua.
- Jantokia, sukalde propioarekin, eta hamaiketako osasungarriak.
- Atseden-gela.
- Arreta ahalik eta pertsonalizatuena, normalean, legeak ezarritako gehienezko ratioen azpitik.
