Utopia baten hasiera

“Lizarra Ikastola” izenaz bataiaturiko ikastetxea 1970eko irailaren 29an jarri zen abian, guraso talde baten iniziatibaz eta Bianako Printzea Instituzioaren, Euskaltzaindiaren, San Fermin Ikastolaren eta Lizarrako Udalaren ordezkarien laguntzarekin. 25 izan ziren Lizarrako Udalak utzitako frontoiko gela batean lehen ikasturteari hasiera eman zioten ikasleak, 240.000 pezetatako aurrekontuarekin.

1931ean Lizarraldean euskara galdu zela mendea betetzear zegoela euskara berreskuratzeko lehenengo saiakera egin zen, Lizarrako Euskal Eskola sortuz. Udalaren babesa izan zuen eskola honek bost urte iraun zituen gerrate zibilaren hasiera arte. Lehen eskola artako sortzaile askok ez zuten etsi, eta Francoren diktadurapean egonik ere 1970ean gaur egun ikastolaren Hazia erein zuten.

1973an ikasleen gurasoek Nabarreria 1 kaleko lokalak erosi zituzten mailegua ordaintzen joateko konpromezua hartuz.

1977 urteak aldaketa garrantzitsua dakar sortu berri den ikastola honentzat: Irakaskuntza eta kontsumo kooperatiba bilakatzen dira ikasleen gurasoak.

1979ko maiatzaren 21ean Hezkuntza eta Zientzia Ministerioak Eskolaurrea legeztatu zuen, irakasleak ordaintzeko diru laguntzak ziurtatuz.

Gizarteari zabalik

1980-81 ikasturtean lanean hasi zen zuzendari berriak norabide berritzailea eman zien alderdi pedagogiko eta administratiboari. Ikastola herrira zabaltzeko (euskal tradizioak Lizarrako kaleetara ateraz: Santa Ageda, Olentzero,…) eta egoera ekonomikoari aurre egiteko (jaietan antolatzen den barraka…) ekimen desberdinak mantendu eta sistematizatu zituen.

1982ko apirilean OHOko 12 gelak legeztaturik geratu ziren. Lehenengoak izan ginen gune erdaldun batean haurrak euskalduntzeko murgiltze eredua erabiltzen; garai horretan Gipuzkoa, Bizkaia eta Nafarroako ikastetxe asko murgiltze eredu hau ezagutzera Lizarra Ikastolara hurbildu ziren.

1985ean Lizarra Ikastolak antolatutako Nafarroa Oinez festan lortutako diruari esker Eskolapioen ikastetxea eta lur saila erosi ziren Kooperatibaren Batzarraren % 99’5 baiezko botoarekin.

Ikastetxe berria: amets zaharra errealitate bilakatu zen

1989an Ikastola berria eraikitzeko lanak martxan jarri ziren, hiru finantziazio iturri zituelarik: Nafarroako Gobernuak emandako 61 milioi pezeta, Kutxak emandako maileguak (90 milioi pezeta) eta 1990ean ospatu beharreko Nafarroa Oinezetik jasoko zena. 100.000 bisitarik erantzun zioten ikastolaren deiari.

1991n Ikastola berria inauguratu zen Lizarrako alkatearen eta Nafarroako Gobernuaren ordezkariaren presentziarekin. Ordutik hona, Hezkuntza proiektu berritzaileek ez dute etenik izan, aurrerantzean ikusiko den bezala.

1995ean Nafarroako Gobernuak DBH eskaintzeko aukera zabaldu zigun, gure etorkizunari bultzada handia emanez. Horretarako, 1993an Eskolapioen ikastetxe zaharrean egindako moldaketek eta legeak eskatutako baldintzak betetzeak gure alde egin zuten.

1999 urtean 0-2 urte bitarteko haurrei eta hauen gurasoei eskainitako zerbitzu berria jarri zen abian, “Lizarra Haur Eskola”rekin adostutako itunaren bitartez.

Kalitatearekin, artearekin eta berrikuntzarekin konpromezua

2003an Nafarroako Gobernuak ikastetxearen kudeaketan kalitatea eta bikaintasuna aitortzen duen Brontzezko Zigilua eman zion.

2004-2005 ikasturtean guztiz arrakastatsua izan den hirugarren Nafarroa Oinez-a antolatu zuen Lizarra Ikastolak. Festa honetatik jasotako diruarekin azken urteetan egindako berrikuntza guztiei aurre egin zaie.

2005-2006 ikasturtean Fundación Navarra para la Calidad erakundeak Europako Bikaintasun Ziurtagiria ( 400+ Zilarra) eman zion.

2008-2009an Madrilgo Hezkuntza eta Zientzia Ministeritzak “Elkarbizitza praktika onei” sari nazionala eman zion

Azkeneko hamarkada. Errekonozimenduak

2009-10 ikasturtean Fundación Navarra para la Calidad erakundeak Europako Bikaintasun Zigilua ( 500+ urrea) eman zion eta Nafarroako Gobernuak 2009ko Nafarroako Bikaintasun Saria. Urte horretan bertan Nafarroako Gobernuko Hezkuntza Departamentuak Elkarbizitzarekin lotutako esperientzia berriztatzailea saritu zuen.

2010-11 ikasturtean Kultura Ministeritzak Sormen Sari Nazionala eman zion, ikastolari “ Hezkuntza Zentru Sortzaile” bereizgarria emanez. 2011ko urtarrilan “Marta Mata Hezkuntza Saria “n finalista suertatzen da Hezkuntza Ministeritzak jarraitutako prozesuan. Urte horretan bertan Nafarroako Gobernuko Hezkuntza Departamentuak Oinarrizko konpetentziekin lotutako DBH 1 mailako “Gure hiriko gida turistikoa” esperientzia berriztatzailea saritu zuen.

Jose Maria Satrustegi zenak Lizarra ikastolaren 25. urteurrenean esandako hitzekin bukatuko dugu: “Lizarra Ikastolarekin atzean gelditu dira Urbasa eta Andiamendiko malkorrak euskarari aspaldi ezarritako harresi gaindituezina. Nafarroa bien arteko zubi sendoa izan zen bere egunean Lizarra Ikastola, eraztun garrantzitsua Nafarroa biak elkartzen dituen hizkuntzaren katean. Ardantzen mustioa xurgatuz jaso du burua euskarak Nafarroan. Etorkizunaren oinarria”

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR